சுனன் தாரமீ

ஸிஹாஹ் ஸித்தாவில் உள்ள அனைத்து கிரந்தங்களையும் நாம் பார்த்துவிட்டோம். கூடவே இப்னு ஹிப்பான், இப்னு குஸைமா, முஸ்னத் அஹ்மத், சுனனுல் குப்ராலிந்நஸாயீ ஆகியவற்றையும் பார்த்தோம். இன்று நாம் பார்க்கவிருப்பது மிக மிக முக்கியமான தவிர்க்க முடியாத ஒரு கிரந்தத்தை பற்றி. அது சுனன் தாரமீ அல்லது முஸ்னத் தாரமீ. 

ஹதீஸ் கலை வரலாற்றை ஆழமாகத் தோண்டிப் பார்த்தால், பல மாபெரும் அறிஞர்களால் இப்னு மாஜாவை விட ஆறாவது நூலாக இருக்கத் தகுதி வாய்ந்தது இதுதான்! என்று ஏகோபித்துப் புகழப்பட்ட ஒரு பிரம்மாண்டமான படைப்பு என்றால் அது சுனன் தாரமீ மட்டும் தான். மார்க்க அறிவைத் தேடும் பயணத்தில், இந்த நூலின் வரலாற்றுப் பின்னணி பற்றி பார்ப்போம். இமாம் தாரமீ பற்றி சமர்கந்தின் மாணிக்கம் என்ற தலைப்பில் ஹதீஸ் கலை அறிஞர்கள் வரலாற்றில் ஏற்கனவே பார்த்துவிட்டோம் அல்லவா!

இமாம் அபூ முஹம்மது அப்துல்லாஹ் இப்னு அப்திர் ரஹ்மான் அத்-தாரமீ (ரஹ்). ஹிஜ்ரி 181-ல் உஸ்பெகிஸ்தானில் உள்ள சமர்கந்தில் பிறந்தார். இவரைப் பற்றி ஒரே வரியில் சொல்ல வேண்டுமென்றால்... நாம் இதுவரை வியந்து பார்த்த இமாம் முஸ்லிம், இமாம் அபூதாவூத், இமாம் திர்மிதீ ஆகியோருக்கெல்லாம் இவர்தான் ஆசிரியர்! ஹதீஸ் கலையில் இமாம் புகாரிக்கு நிகரான ஒரு மாபெரும் ஆளுமையாக அன்றைய அறிஞர்களால் இவர் போற்றப்பட்டார்.

இஸ்லாமிய வரலாற்று மாணவர்களுக்கு இது ஒரு மிகச் சுவாரஸ்யமான ஆய்வுக் களமாகும்.

இமாம் இப்னு ஸலாஹ், இமாம் இப்னு ஹஜர் அல்-அஸ்கலானி போன்ற மாபெரும் ஹதீஸ் கலை வல்லுநர்கள், குதுபுஸ் சித்தாவில் இப்னு மாஜாவுக்குப் பதிலாக சுனன் தாரமீயைத்தான் ஆறாவது நூலாக வைத்திருக்க வேண்டும் என்று வாதிட்டனர். அதற்குக் காரணம்:

சுனன் இப்னு மாஜாவில் பலவீனமான (ளயீஃப்) மற்றும் சில மிகைப்படுத்தப்பட்ட செய்திகள் கலந்திருந்தன. ஆனால் சுனன் தாரமீயில் பலவீனமான ஹதீஸ்கள் மிகக் குறைவு. இட்டுக்கட்டப்பட்ட (மௌளூஉ) செய்திகள் இதில் இல்லவே இல்லை என்று சொல்லும் அளவிற்கு மிகத் தூய்மையானது!

தாரமீயில் உள்ள பெரும்பாலான ஹதீஸ்கள் மற்ற ஐந்து நூல்களிலேயே வந்துவிட்டன. ஆனால் இப்னு மாஜாவில், மற்ற நூல்களில் இல்லாத பல புதிய ஹதீஸ்கள் இருந்ததால், அன்றைய அறிஞர்கள் பலரும் இப்னு மாஜாவை ஆறாவது நூலாக ஏற்றுக்கொண்டனர்.

இந்த நூலை 'முஸ்னத் தாரமீ' என்றும் அழைப்பார்கள். முந்தைய பதிவில் நாம் பார்த்தபடி, முஸ்னத் என்றால் அறிவிப்பாளர் (சஹாபி) அடிப்படையில் தொகுக்கப்படுவது. ஆனால் இமாம் தாரமீ அவர்கள் தனது நூலை 'சுனன்' அடிப்படையில், அதாவது தொழுகை, நோன்பு எனச் சட்டவியல் தலைப்புகளின் கீழ்தான் அழகாகத் தொகுத்துள்ளார். ஹதீஸ்களின் அறிவிப்பாளர் தொடர் மிக நேர்த்தியாக இணைக்கப்பட்டிருப்பதால் அறிஞர்கள் இதனை முஸ்னத் என்றும் அழைக்கின்றனர்.

இந்த நூலின் மிகச்சிறந்த பொக்கிஷமே இமாம் தாரமீ எழுதியுள்ள நீண்ட முகவுரைதான். நேரடியாகச் சட்டங்களுக்குள் நுழையாமல்,

நபிகளாரின் சீரா (வாழ்க்கை வரலாறு),

ஹதீஸ்களைப் பின்பற்றுவதன் முக்கியத்துவம்,

மார்க்க அறிஞர்களின் நற்பண்புகள்,

போதிய அறிவில்லாமல் மார்க்கத் தீர்ப்புகள் வழங்குபவர்களுக்கு எதிரான கடுமையான எச்சரிக்கைகள் என மிக விரிவானதொரு தத்துவார்த்தப் பின்னணியை இந்த முகவுரையில் அவர் பதிவு செய்துள்ளார். மார்க்கப் பணிகளிலும், சமூக சீர்திருத்தக் களத்திலும் ஈடுபடும் நாம் ஒவ்வொருவரும் கட்டாயம் வாசிக்க வேண்டிய பகுதி இது.

சுனன் தாரமீயில் நபிகளாரின் ஹதீஸ்கள் மட்டுமன்றி, சஹாபாக்கள் மற்றும் தாபியீன்களின் மார்க்கத் தீர்ப்புகளும் (ஆஸார்கள்) ஏராளமாகப் பதிவு செய்யப்பட்டுள்ளன. ஆரம்பகால இஸ்லாமியச் சமுதாயம் எப்படி மார்க்கச் சட்டங்களை அணுகியது என்பதை ஒப்பீட்டு ஆய்வாகப் படிக்க இது ஒரு சிறந்த கையேடு.

'குதுபுஸ் சித்தா' பட்டியலில் இது அதிகாரப்பூர்வமாக இல்லாவிட்டாலும், ஹதீஸ் கலையின் தூய்மையைக் கட்டிக்காப்பதில் இமாம் தாரமீயின் பங்களிப்பை வரலாறு ஒருபோதும் மறக்காது. மார்க்கத்தை அதன் மூல ஆதாரங்களிலிருந்து, எவ்வித சமரசமுமின்றிப் படிக்க நினைக்கும் ஒவ்வொரு மாணவனும் தேடிப் படிக்க வேண்டிய உன்னதப் படைப்பு இது.

மூவாயிரத்திற்கும் மேற்பட்ட ஹதீஸ்களை கொண்ட இந்த உன்னத கிரந்தத்தின் ஸவாயிது தொகுப்பே என் கைகளில் தவழ்கிறது.

- Abdullah Ibnu Naseer