ஹுதைஃபா இப்னுல் யமான் (ரலி).

ஒருவருடைய நம்பகத்தன்மையை எடைபோட வேண்டுமென்றால், அவரிடம் ஒரு ரகசியத்தைக் கொடுத்துப் பாருங்கள். அவர் அதை எப்படிப் பாதுகாக்கிறார் என்பதைப் பொறுத்தே அவருடைய ஈமானின் உறுதி வெளிப்படும். இன்று, ரகசியம் என்ற பெயரில் அடுத்தவர்களின் குறைகளை ஊரெங்கும் பறைசாற்றும் மனிதர்களைப் பார்க்கிறோம். ஆனால், தன் நெஞ்சுக்குள் பல பேருடைய ரகசியங்களைப் புதைத்து வைத்துக்கொண்டு, இறுதி மூச்சு வரை அதை யாருக்கும் வெளிப்படுத்தாத ஒரு இரும்பு மனிதரை இஸ்லாமிய வரலாறு சந்தித்தது. 

அவர்தான் 'சிர்ருர் ரஸூல்' (இறைத்தூதரின் ரகசியக் காப்பாளர்) என்று அழைக்கப்பட்ட ஹுதைஃபா இப்னுல் யமான் (ரலி).ஹுதைஃபா (ரலி) அவர்களின் வாழ்க்கை வெறும் வீரத்தால் மட்டும் நிரம்பியதல்ல, ஆழமான ஈமானியப் பக்குவத்தாலும் நிரம்பியது. 

உஹத் போர்க்களத்தில் ஒரு நெஞ்சைப் பிளக்கும் காட்சி. முஸ்லிம் படைகளுக்குள் ஏற்பட்ட குழப்பத்தில், ஹுதைஃபாவின் தந்தை அல்-யமான் (ரலி) அவர்களை எதிரி எனத் தவறாக நினைத்து முஸ்லிம் வீரர்களே தாக்கத் தொடங்கிவிட்டார்கள். தூரத்தில் இதைப் பார்த்த ஹுதைஃபா (ரலி), அல்லாஹ்வின் அடியார்களே! அவர் என் தந்தை! என் தந்தை! என்று கத்தியவாறே ஓடினார். ஆனால், அவர் குரல் அந்தப் போர்க்களத்தின் சத்தத்தில் யாருக்கும் கேட்கவில்லை. அவர் கண் முன்னே அவருடைய சொந்தத் தந்தை, தன் தோழர்களாலேயே வெட்டிக் கொல்லப்பட்டார்.

சொந்தத் தந்தை தன் கண் முன்னே கொல்லப்பட்டால் ஒரு மகனின் மனநிலை எப்படி இருக்கும்? கோபம் கொப்பளிக்காதா? பழிவாங்கத் துடிக்காதா? ஆனால், ஹுதைஃபா (ரலி) தன் தந்தையைக் கொன்ற முஸ்லிம்களைப் பார்த்து, எந்தக் கோபமும் இல்லாமல் கூறினார்: "அல்லாஹ் உங்களை மன்னிப்பானாக! அவன்தான் கருணையாளர்களுக்கெல்லாம் பெரும் கருணையாளன்!" அண்ணலார் முஹம்மத் (ஸல்) அவர்கள் அந்தத் தவறுக்காக நஷ்டஈடு (திய்யத்) வழங்கியபோது, அந்தப் பணத்தையும் மற்ற முஸ்லிம்களின் நலனுக்காகத் தர்மம் செய்துவிட்டார் அந்தப் பெருந்தன்மைக்குச் சொந்தக்காரர்!

அகழ்ப்போரின் (கந்தக்) கொடூரமான இருண்ட இரவு அது. வாட்டும் குளிர், பசியின் கொடுமை, எதிரிகளின் பயம் என அனைத்தும் சூழ்ந்திருந்த நேரம். "எதிரிகளின் கூடாரத்திற்குள் ஊடுருவி, செய்திகளைக் கொண்டு வருபவர் யார்? அவருக்குச் சுவர்க்கத்தில் என்னோடு இருக்கும் பாக்கியம் கிடைக்கும்" என்று நபிகளார் கேட்டார்கள். பசியாலும் குளிராலும் பல சஹாபாக்கள் தலையைக் குனிந்துகொண்டனர். அப்போது நபிகளார் ஹுதைஃபாவை அழைத்து அந்த அபாயகரமான பொறுப்பை ஒப்படைத்தார்கள். எதிரிகளின் தலைவர் அபூஸுஃப்யானுக்கு மிக அருகில் சென்று, எந்தச் சலனமும் இன்றி ஒற்றறிந்து வந்த அந்தத் தைரியம் சாதாரணமானதல்ல!

ஹுதைஃபா (ரலி) அவர்களுக்கு நபிகளார் கொடுத்த ஆகப்பெரிய அங்கீகாரம், மதீனாவில் இருந்த முனாஃபிக்களின் (நயவஞ்சகர்களின்) பெயர்ப்பட்டியலை அவரிடம் மட்டுமே ரகசியமாகக் கூறியதுதான். ஒட்டுமொத்த இஸ்லாமிய சாம்ராஜ்யத்தையும் கட்டியாண்ட மாபெரும் கலீஃபா உமர் (ரலி) அவர்கள் கூட, ஹுதைஃபா (ரலி) அவர்களைப் பார்த்தால் நடுங்குவார்கள். ஹுதைஃபாவின் கையைப் பிடித்துக்கொண்டு, ஹுதைஃபாவே! அல்லாஹ்வின் பெயரால் கேட்கிறேன், அந்த நயவஞ்சகர்களின் பட்டியலில் என் பெயரும் இருக்கிறதா? என்று உமர் (ரலி) கண்ணீர் மல்கக் கேட்பார்கள் என்றால், ஹுதைஃபா (ரலி) சுமந்திருந்த அந்த ரகசியத்தின் கனம் எவ்வளவு பெரியது! மதீனாவில் யாராவது இறந்துவிட்டால், உமர் (ரலி) அவர்கள் முதலில் ஹுதைஃபா (ரலி) அந்த ஜனாஸா தொழுகைக்கு வருகிறாரா என்று பார்ப்பார்கள். அவர் வரவில்லை என்றால், இறந்தது ஒரு நயவஞ்சகன் என்று உணர்ந்து உமரும் (ரலி) அந்தத் தொழுகையைப் புறக்கணிப்பார்.

இன்றைய நமது நிலை என்ன? நாம் மற்றவர்களின் ரகசியங்களை எப்படிப் பாதுகாக்கிறோம்? நம்மிடம் கூறப்படும் அமானிதங்களை நாம் சரியாகப் பேணுகிறோமா? உமர் (ரலி) போன்ற மாபெரும் தியாகிகளே, தங்களுக்குள் ஏதேனும் நயவஞ்சகத்தன்மை வந்துவிட்டதா என்று பயந்து நடுங்கும்போது, ஈமானில் எந்த உறுதியும் இல்லாத நாம் எவ்வளவு அலட்சியமாக இருக்கிறோம்!

பதவியும் அதிகாரமும் வந்துவிட்டால் மனிதன் தன் ரகசியங்களைப் பயன்படுத்தி மற்றவர்களை மிரட்டப் பார்ப்பான். ஆனால், தன்னிடம் இருந்த அந்தப் பெரும் ரகசியத்தை வைத்து ஹுதைஃபா (ரலி) எந்த இடத்திலும் தற்பெருமை கொண்டதில்லை, எவரையும் அச்சுறுத்தியதுமில்லை. ஈமான் என்பது வெற்று வார்த்தைகளில் இல்லை. அது அமானிதங்களைப் பேணுவதிலும், உள்ளத்தின் தூய்மையிலும்தான் இருக்கிறது என்பதை ஹுதைஃபா (ரலி) அவர்களின் வாழ்க்கை நமக்கு இடித்துரைக்கிறது. அந்த மாவீரரின் தூய்மையான ஈமானையும், ரகசியங்களைப் பேணும் அமானிதத் தன்மையையும் அல்லாஹ் நமக்கும் வழங்குவானாக!

✍️ Abdullah Ibnu Naseer 

#IslamicHistory #SahabaSeries #Ramadan2026 #HudhayfahIbnAlYaman #SecretKeeper #Amanah #Khandaq #AbdullahIbnuNaseerWriteups