மஸ்ஜிதுல் அக்ஸா

இஸ்லாமிய வரலாற்றிலும், உலக வரலாற்றிலும் மிக முக்கியமான, அதேசமயம் அதிகமான தவறான புரிதல்களுக்கு உள்ளான ஒரு இடம் உண்டு என்றால் அது ஜெருசலேமில் உள்ள மஸ்ஜிதுல் அக்ஸா தான்.

இஸ்லாமியர்களின் முதல் கிப்லாவாகவும் (தொழும் திசை), மக்கா மற்றும் மதீனாவிற்கு அடுத்தபடியாக மூன்றாவது புனிதத் தலமாகவும் விளங்கும் மஸ்ஜிதுல் அக்ஸா பற்றிய தெளிவூட்டல் பதிவே இது.

ஒரு பதிவு போட்டால் சவூதி மத்ஹலி சலபு சிந்தனையாளர்களும் அரைகுறை வாசிப்பாளர்களும் இது அக்ஸா அல்ல அது தான் அக்ஸா அப்படி இப்படி என்று உருட்ட தொடங்குவார்கள் எனவே அக்ஸா ஆதாரப்பூர்வமான தகவல்களைப் பார்ப்போம்.

அக்ஸா என்றால் என்ன? அரபு மொழியில் அக்ஸா என்றால் 'மிகத் தொலைவில் உள்ள' அல்லது 'கடைக்கோடி' என்று பொருள். மக்காவில் உள்ள 'மஸ்ஜிதுல் ஹரம்' (கஃபா) இலிருந்து பல நூறு மைல்கள் தொலைவில் இந்தப் பள்ளிவாசல் அமைந்திருப்பதாலேயே இதற்கு 'மஸ்ஜிதுல் அக்ஸா' (மிகத் தொலைவில் உள்ள பள்ளிவாசல்) என்று திருக்குர்ஆனில் அல்லாஹ் பெயரிட்டுள்ளான். இஸ்ரா மற்றும் மிஃராஜ் (நபி (ஸல்) அவர்களின் விண்வெளிப் பயணம்) நிகழ்வின் போது இந்தப் பெயர் குர்ஆனில் (17:1) குறிப்பிடப்பட்டுள்ளது.

உண்மையான அக்ஸா எது? இன்று சமூக வலைத்தளங்களிலும், ஊடகங்களிலும் தங்க நிறக் குவிமாடம் கொண்ட கட்டடத்தையோ அல்லது சாம்பல் நிறக் குவிமாடம் கொண்ட கட்டடத்தையோ காட்டி "இதுதான் அக்ஸா" என்று கூறுவதைப் பார்த்திருப்போம். இதனால் பலருக்கும் குழப்பம் ஏற்படுகிறது. உண்மையான அக்ஸா எது?

உண்மை என்னவென்றால்: 'மஸ்ஜிதுல் அக்ஸா' என்பது ஒரு குறிப்பிட்ட கட்டடத்தின் பெயரல்ல. ஜெருசலேமின் பழைய நகரத்தில் உள்ள சுமார் 35 ஏக்கர் பரப்பளவு கொண்ட ஒரு முழுமையான வளாகமே மஸ்ஜிதுல் அக்ஸா ஆகும். இந்த முழு வளாகத்தையும் அல்-ஹரம் அஷ்-ஷரீஃப் என்றும் அழைப்பார்கள். இந்த நாற்புறமும் மதில் சுவர்களால் சூழப்பட்ட 35 ஏக்கர் பரப்பளவிற்குள் உள்ள கட்டடங்கள், மரங்கள், திறந்தவெளிகள், நிலத்தடி அறைகள், நீர் ஊற்றுகள் என அனைத்தும் சேர்ந்ததுதான் மஸ்ஜிதுல் அக்ஸா.

அக்ஸா வளாகத்தினுள் உள்ள முக்கியப் பகுதிகள்

இந்த 35 ஏக்கர் வளாகத்திற்குள் சுமார் 200-க்கும் மேற்பட்ட வரலாற்றுச் சின்னங்கள் உள்ளன. அவற்றில் மிக முக்கியமானவை இரண்டு:

1. குப்பதுஸ் ஸக்ரா (Dome of the Rock)

கண்கவர் தங்க நிறக் குவிமாடத்தைக் கொண்ட எண்கோண வடிவக் கட்டடம். உமையா கலிஃபா அப்துல் மலிக் பின் மர்வான் (கி.பி. 691) காலத்தில் இது கட்டப்பட்டது. இந்தக் கட்டடத்தின் மையத்தில் ஒரு பெரிய பாறை (ஸக்ரா) உள்ளது. இங்கிருந்துதான் முஹம்மது நபி (ஸல்) அவர்கள் மிஃராஜ் (விண்ணுலகப் பயணம்) சென்றார்கள் என்பது வரலாற்று நம்பிக்கை. இது அக்ஸா வளாகத்தின் ஒரு முக்கியப் பகுதியே தவிர, இது மட்டுமே முழுமையான அக்ஸா அல்ல.

கிப்லி மஸ்ஜித்.

அக்ஸா வளாகத்தின் தெற்குப் பகுதியில் அமைந்துள்ள சாம்பல்/கருப்பு நிற ஈயக் குவிமாடம் கொண்ட பெரிய பள்ளிவாசல். கலீஃபா உமர் (ரலி) ஜெருசலேமை கைப்பற்றிய போது ஒரு சிறிய பள்ளிவாசலாக மரங்களால் ஆரம்பிக்கப்பட்டு, பின்னர் உமையா கலிஃபாக்களால் பிரம்மாண்டமாக விரிவுபடுத்தப்பட்டது. இது கிப்லாவை (மக்காவை) நோக்கி தெற்குப் பகுதியில் இருப்பதால் 'கிப்லி மஸ்ஜித்' எனப்படுகிறது. இமாம் நின்று கூட்டுத் தொழுகையை நடத்தும் பிரதான இடம் இதுதான். பலரும் இதையே 'அக்ஸா' என சுருக்கி அழைக்கின்றனர், ஆனால் இதுவும் அக்ஸா வளாகத்தின் ஒரு பிரதான கட்டடமே.

பிற முக்கிய இடங்கள்.

முஸல்லா மர்வான்: இது பூமிக்கு அடியில் அமைந்துள்ள பிரம்மாண்டமான தொழுகையிடம்.

புராக் சுவர்: வளாகத்தின் மேற்குச் சுவர். நபி (ஸல்) அவர்கள் தமது வாகனமான 'புராக்'கை இங்குதான் கட்டினார்கள் என்பது வரலாறு. யூதர்கள் இதனை அழுகைச் சுவர் என்று கூறி தங்களின் புனித இடமாகக் கருதுகின்றனர்.

பாப் அர்-ரஹ்மா: வரலாற்று சிறப்புமிக்க நுழைவாயில்.

தங்கக் குவிமாடம் (குப்பதுஸ் ஸக்ரா) + சாம்பல் குவிமாடம் (கிப்லி மஸ்ஜித்) + அங்குள்ள முற்றங்கள், சுவர்கள் அனைத்தும் அடங்கிய அந்த 35 ஏக்கர் நிலப்பரப்பு முழுவதுமே மஸ்ஜிதுல் அக்ஸா தான்!

மஸ்ஜிதுல் அக்ஸாவின் வரலாறு இஸ்லாமிய நம்பிக்கையின்படி ஆதாம் (அலை) காலத்திலிருந்தே தொடங்குகிறது.

உலகில் கட்டப்பட்ட இரண்டாவது பள்ளிவாசல்:

ஸஹீஹ் புகாரி மற்றும் முஸ்லிமில் இடம்பெற்றுள்ள ஒரு புகழ்பெற்ற ஹதீஸ்:

அபூதர் (ரலி) அவர்கள் நபி (ஸல்) அவர்களிடம், "அல்லாஹ்வின் தூதரே! பூமியில் முதன்முதலாக அமைக்கப்பட்ட பள்ளிவாசல் எது?" என்று கேட்டார்கள். அதற்கு நபி (ஸல்) அவர்கள், "மஸ்ஜிதுல் ஹராம் (கஃபா)" என்றார்கள். நான், "பின்னர் எது?" என்று கேட்டேன். அதற்கு அவர்கள், "மஸ்ஜிதுல் அக்ஸா" என்றார்கள். "அவ்விரண்டிற்கும் இடையே எத்தனை கால இடைவெளி?" என்று நான் கேட்டேன். அதற்கு அவர்கள், "நாற்பது ஆண்டுகள்" என்று பதிலளித்தார்கள்.

நபிமார்களின் பூமி:

இப்ராஹீம் (அலை), இஸ்ஹாக் (அலை), யஃகூப் (அலை), தாவூத் (அலை) போன்ற பல நபிமார்கள் இங்கு வாழ்ந்துள்ளனர். சுலைமான் (அலை) அவர்கள் இந்தப் பள்ளிவாசலை மிகவும் பிரம்மாண்டமாகப் புதுப்பித்துக் கட்டினார்கள். இதைத்தான் யூதர்கள் 'சாலமனின் ஆலயம்' (Temple of Solomon) என்கிறார்கள்.

உமர் (ரலி) அவர்களின் வருகை (கி.பி 637):

ரோமர்களின் ஆக்கிரமிப்பில் பல ஆண்டுகள் குப்பைக் காடாகக் கிடந்த இந்த இடத்தை, இஸ்லாமிய சாம்ராஜ்யத்தின் இரண்டாவது கலீஃபா உமர் (ரலி) அவர்கள் ஜெருசலேமைத் திறந்த போது, தமது சொந்தக் கைகளால் சுத்தம் செய்து அங்கு தொழுகையை நிலைநாட்டினார்கள்.

சிலுவைப் போரும் சலாஹுத்தீன் அய்யூபியின் மீட்பும் (கி.பி 1187):

1099-ல் சிலுவைப் போர் வீரர்களால் அக்ஸா கைப்பற்றப்பட்டு, கிப்லி மஸ்ஜித் அரண்மனையாகவும், குப்பதுஸ் ஸக்ரா தேவாலயமாகவும் மாற்றப்பட்டது. கிட்டத்தட்ட 88 ஆண்டுகளுக்குப் பிறகு, மாவீரன் சுல்தான் சலாஹுத்தீன் அய்யூபி ஜெருசலேமை மீட்டு, மீண்டும் அதை தூய்மைப்படுத்தி இஸ்லாமியர்களின் வழிபாட்டுத் தலமாக மாற்றினார்.

மஸ்ஜிதுல் அக்ஸா என்பது வெறும் கற்களாலும் செங்கற்களாலும் கட்டப்பட்ட ஒரு கட்டடமல்ல. அது பல நபிமார்களின் காலடித் தடம் பதிந்த புனித பூமி. ஒரு முஸ்லிம் தனது வாழ்நாளில் சந்திக்க விரும்பும் மிக முக்கியமான மூன்று பள்ளிகளில் இதுவும் ஒன்று. கிப்லி மஸ்ஜிதை மட்டும் உடைத்துவிட்டால் அக்ஸா அழிந்துவிடும் என்றோ, குப்பதுஸ் ஸக்ராவைக் காட்டி இதுதான் அக்ஸா என திசைதிருப்புகிறார்கள் என்றோ எண்ணுவது வரலாற்றுப் பிழையாகும். அந்த 35 ஏக்கர் நிலத்தின் ஒவ்வொரு அங்குலமும் மஸ்ஜிதுல் அக்ஸாவே என்பதே மறுக்க முடியாத வரலாற்று உண்மையாகும்.

- Abdullah Ibnu Naseer