இப்னு சீரின்

பஸ்ரா நகரத்தின் வரலாற்றை எழுதும்போது, அங்கே வாழ்ந்த இரண்டு மாபெரும் தாபியீன்களைப் பிரிக்கவே முடியாது. ஒருவர் ஹஸன் அல்-பஸரீ, மற்றொருவர் நாம் இப்போது பார்க்கப் போகும் இப்னு சீரின். இன்று உலகில் உள்ள பெரும்பாலான மக்கள் இவரை "கனவுகளுக்குப் பலன் சொல்லும் அறிஞர்" என்று மட்டுமே சுருக்கிப் பார்த்துவிட்டார்கள். ஆனால், ஹதீஸ் கலையில் அவர் ஒரு மாபெரும் இமயமலை என்பது பலருக்கும் தெரிவதில்லை. 

யார் வேண்டுமானாலும் மார்க்கத்தைப் பேசலாம், யாரிடம் வேண்டுமானாலும் மார்க்கத்தைக் கேட்கலாம் என்ற நிலைமை மாறி, சொல்பவன் யார்? அவனுடைய தகுதி என்ன? என்று இஸ்லாமிய சமூகம் ஒருவரைச் சல்லடை போட்டுச் சலித்தெடுக்கக் காரணமாக அமைந்த அந்தப் புகழ்பெற்ற ஒற்றை வசனத்தைச் சொன்ன மாமேதை இவர்தான்!

பெயர்: முஹம்மது இப்னு சீரின் அல்-அன்ஸாரி.

சிறப்புப் பெயர்: அபூபக்கர்.

பிறப்பு: உஸ்மான் (ரலி) அவர்களின் ஆட்சிக் காலத்தில், ஹிஜ்ரி 33-ம் ஆண்டு பிறந்தார்.

இறப்பு: ஹிஜ்ரி 110 (தனது 77-வது வயதில் பஸ்ராவில் மரணமடைந்தார்).

சிறப்பு வாய்ந்த பெற்றோர்: இவருடைய தந்தை 'சீரின்' அனஸ் இப்னு மாலிக் (ரலி) அவர்களின் அடிமையாக இருந்து விடுவிக்கப்பட்டவர். இவருடைய தாய் 'ஸஃபிய்யா' முதல் கலீஃபா அபூபக்கர் (ரலி) அவர்களின் அடிமையாக இருந்து விடுவிக்கப்பட்டவர். இவர்களின் திருமணத்தில் பல மாபெரும் சஹாபாக்கள் கலந்துகொண்டு வாழ்த்தியுள்ளனர்!

ஆரம்ப காலத்தில் மக்கள் ஹதீஸ்களை அறிவிக்கும்போது, "எனக்கு இன்னார் சொன்னார்" என்று அறிவிப்பாளர் தொடரைச் (இஸ்னாத்) சொல்லும் பழக்கம் பெரிய அளவில் இல்லாமல் இருந்தது. ஆனால், குழப்பங்களும் பொய்களும் பெருகியபோது, இப்னு சீரின் ஒரு பிரம்மாண்டமான தத்துவத்தை உலகுக்கு அறிவித்தார்:

நிச்சயமாக இந்தக் கல்வி (ஹதீஸ்) மார்க்கமாகும். எனவே, உங்கள் மார்க்கத்தை நீங்கள் யாரிடமிருந்து பெறுகிறீர்கள் என்பதைச் சிந்தித்துப் பாருங்கள்! (إن هذا العلم دين فانظروا عمن تأخذون دينكم)

இமாம் முஸ்லிம் (ரஹ்) அவர்கள் தனது 'ஸஹீஹ் முஸ்லிம்' நூலின் முகவுரையில் இதைப் பதிவு செய்துள்ளார். இந்த ஒற்றை வசனத்திற்குப் பிறகுதான், ஹதீஸ் அறிவிப்பவர்களின் தகுதியை ஆராயும் முறை கடுமையாக்கப்பட்டது.

பல அறிஞர்கள் ஹதீஸ்களை அறிவிக்கும்போது, அதன் கருத்து மாறாமல் தங்கள் சொந்த வார்த்தைகளில் அறிவிப்பார்கள். இது மார்க்கத்தில் அனுமதிக்கப்பட்டதுதான். ஆனால், இப்னு சீரின் அவர்கள் இதில் மிகக் கடுமையானவர். ரசூலுல்லாஹ் (ஸல்) அவர்கள் என்ன வார்த்தையைப் பயன்படுத்தினார்களோ, அந்த வார்த்தையில்தான் ஒரு எழுத்து கூடப் பிசகாமல் ஹதீஸை அறிவிக்க வேண்டும் என்பதில் பிடிவாதமாக இருப்பார். அந்த அளவுக்கு அவர் மார்க்க விஷயத்தில் 'வறஃ' (பேணுதல்) கொண்டவராக இருந்தார்.

இவருடைய சமகாலத்தவரான ஹஸன் அல்-பஸரீ (ரஹ்) எப்போதும் நரகத்தைப் பற்றிய பயத்தால் கவலையான முகத்துடனேயே இருப்பார். ஆனால் இப்னு சீரின் முற்றிலும் நேர்மாறானவர்.

அவர் பகலில் சந்தைகளில் நடக்கும்போது, மக்களைப் பார்த்துச் சிரித்துப் பேசுவார்; கேலி செய்வார். அவருடைய முகத்தில் எப்போதும் ஒரு புன்னகை இருக்கும். ஆனால், இரவு வந்து அவர் தன் வீட்டுக்குள் தனிமையில் இறைவனை வணங்கத் தொடங்கிவிட்டால், பிள்ளையை இழந்த தாயைப் போலத் தேம்பித் தேம்பி அழுவார்! என்று வரலாற்றில் பதிவு செய்யப்பட்டுள்ளது.

நாம் யாரிடமாவது மார்க்கச் சட்டங்களைக் கேட்கும்போதோ அல்லது யூடியூபில் மார்க்கப் பயான்களைக் கேட்கும்போதோ, "இவர் குர்ஆன், சுன்னாவைச் சரியாகப் படித்தவரா? இவருடைய பின்புலம் என்ன?" என்று ஆராய்ந்து பார்க்க வேண்டும் என்ற மிகப் பெரிய பாடத்தை 1300 ஆண்டுகளுக்கு முன்பே இப்னு சீரின் கற்றுக்கொடுத்துவிட்டார். மார்க்கத்தை வெறும் செய்தியாகப் பார்க்காமல், அதை நம் நரம்புகளில் ஓடும் உயிராகக் கருதியதால்தான் இந்தத் தாபியீன்கள் இன்றுவரை வரலாற்றில் மின்னித் திகழ்கிறார்கள்!

✍️ எழுத்து: Abdullah Ibnu Naseer 

#History #IbnSirin #MuhammadIbnSirin #Tabiin #Basra #HadithScholar #DreamInterpretation #Isnad #IslamicHistory #Facts #AbdullahIbnuNaseerWriteups