இப்னு அபீ ஷைபா

ஒரு கட்டிடம் உயரமாக எழுவதற்கு அஸ்திவாரம் எவ்வளவு முக்கியமோ, அப்படித்தான் ஸிஹாஹ் ஸித்தா (ஆறு ஆதாரப்பூர்வமான கிரந்தங்கள்) உருாவதற்கு இவர் முக்கியம். இமாம் புகாரி, முஸ்லிம், அபூதாவூத், இப்னு மாஜா என அத்தனை பேரும் இவரிடம் பாடம் படித்தவர்கள். குறிப்பாக, இமாம் முஸ்லிம் (ரஹ்) இவரை எவ்வளவு நேசித்தார் தெரியுமா? தனது 'ஸஹீஹ் முஸ்லிம்' நூலில் மட்டும் கிட்டத்தட்ட 1,540 இடங்களில் எங்களுக்கு அபூபக்ர் பின் அபீ ஷைபா அறிவித்தார் என்று பதிவு செய்துள்ளார்.

ஹதீஸ் கலையின் ஒரு மாபெரும் சகாப்தம் இவர்!

பெயர்: அபூ பக்ர் அப்துல்லாஹ் பின் முஹம்மத் பின் அபீ ஷைபா.

காலம்: ஹிஜ்ரி 159 - 235

ஊர்: கூஃபா (ஈராக்)

மாணவர்கள்: இமாம் புகாரி, இமாம் முஸ்லிம், இமாம் அபூதாவூத், இமாம் இப்னு மாஜா (நஸாயி மற்றும் திர்மிதி தவிர்த்து மற்ற நான்கு பேரும் இவரிடம் பாடம் படித்தவர்கள்).

இறப்பு: ஹிஜ்ரி 235 (முஹர்ரம் மாதம்).

யார் இந்த அபீ ஷைபா குடும்பத்தினர்?

கூஃபா நகரில் பைத்து அபீ ஷைபா (House of Abi Shaybah) என்றால் அது ஒரு கல்வி மாளிகை. இவருடைய தாத்தா (அபீ ஷைபா), தந்தை (முஹம்மத்), சகோதரர் (உஸ்மான் பின் அபீ ஷைபா), மகன், பேரன் என அனைவருமே மாபெரும் ஹதீஸ் அறிஞர்கள். ஒரு குடும்பமே மார்க்கத்திற்காகத் தன்னை அர்ப்பணித்த வரலாறு இது.

(இவரின் சகோதரர் உஸ்மான் பின் அபீ ஷைபாவும் புகாரி, முஸ்லிமின் ஆசிரியர் என்பது இக்குடும்பத்தின் தனிச்சிறப்பு).

இவர் எழுதிய முஸன்னஃப் இப்னு அபீஷைபா நூல் ஹதீஸ் உலகின் ஒரு அதிசயம். இதில் சுமார் 37,000-க்கும் மேற்பட்ட ஹதீஸ்கள் மற்றும் அஸர்கள் (நபித்தோழர்களின் கூற்றுக்கள்) உள்ளன. ஹதீஸ் உலகின் பெரிய நூற்களில் இதுவும் ஒன்று. இது வெறும் நபிமொழிகளை மட்டும் தொகுக்காமல், ஒவ்வொரு விஷயத்திலும் ஸஹாபாக்களும், தாபியீன்களும் என்ன தீர்ப்பு வழங்கினார்கள்? எப்படித் தொழுதார்கள்? எப்படி வியாபாரம் செய்தார்கள்? என்பதைத் துல்லியமாகப் பதிவு செய்துள்ளார். இன்று சஹாபாக்களின் நடைமுறையை நாம் அறிந்துகொள்ள உலகிலிருக்கும் மிகப்பெரிய ஆதாரம் இந்த நூல்தான். இதை இழந்துவிட்டால், இஸ்லாமிய வரலாற்றின் ஒரு பெரும் பகுதியை நாம் இழந்துவிடுவோம்.

இவரின் நினைவாற்றலைக் கண்டு அக்கால அறிஞர்களே மிரண்டு போனார்கள்.

இமாம் அபூ ஸுர்ஆ (ரஹ்) கூறினார்: நான் இப்னு அபீ ஷைபாவை விடச் சிறந்த நினைவாற்றல் கொண்ட ஒருவரைப் பார்த்ததில்லை. அவர் வகுப்பிற்கு வரும்போது எந்தப் புத்தகத்தையும் கையில் கொண்டு வரமாட்டார். அத்தனையும் அவர் மனதில் இருந்தது!

ஒருமுறை மூத்த முஹத்திஸ் ஒருவரிடம், உலகிலேயே அதிக நினைவாற்றல் கொண்டவர் யார்? என்று கேட்கப்பட்ட போது. அதற்கு அவர், "இப்னு அபீ ஷைபா தான்!" என்று தயங்காமல் பதிலளித்தார். இவர் பக்தாத் நகரின் பெரிய பள்ளிவாசலில் அமர்ந்து ஹதீஸ் அறிவிக்கத் தொடங்கினால், மக்கள் கூட்டம் அலைமோதும். வரலாற்று ஆசிரியர்கள் கூறுகிறார்கள்:

இமாம் அஹ்மத் பின் ஹன்பலும் இவரும் சமகாலத்தவர்கள். இருவரும் அடிக்கடிச் சந்தித்து ஹதீஸ் ஆய்வுகளில் ஈடுபடுவார்கள். இமாம் அஹ்மத் இவரைப் பற்றிக் கூறும்போது, இவர் ஹதீஸ் கலையில் நேர்மையானவர் என்று சான்று பகர்ந்துள்ளார்.

நாம் இன்று ஒரு ஹதீஸை இது புகாரியில் உள்ளது, முஸ்லிமில் உள்ளது" என்று எளிதாகச் சொல்லிவிடுகிறோம். ஆனால் அந்த புகாரிக்கும் முஸ்லிமுக்கும் அந்த ஹதீஸைக் கொண்டு வந்து சேர்த்த பெரிய ஆதாரம் இந்த இப்னு அபீ ஷைபா தான். அஸ்திவாரங்களை நாம் மறந்துவிடக் கூடாது!

✍️ எழுத்து: Abdullah Ibnu Naseer 

#History #IbnAbiShaybah #Musannaf #TeacherOfBukhari #Kufa #HadithGiant #Facts #IslamicScholar #AbdullahIbnuNaseerWriteups